Elektro og datateknologi

Vg1 Elektro og datateknologi

I tillegg til elektrofaga (programfag) får du opplæring i fellesfag på Vg1 som omfattar engelsk, matematikk, kroppsøving og naturfag. Dette gjer at du etter Vg1 og Vg2 kan ta påbygg til generell studiekompetanse og ha moglegheit til å ta utdanning på høgskule og universitet. Eller du kan gå læretida i ei bedrift og ta fagprøve i eit av dei mange faga innanfor denne yrkesretninga.

I praksis går mykje av undervisinga føre seg gjennom arbeidsoppgåver i elektroverkstaden på skulen. Her set du som elev opp styringssystem i miniatyrskala, som simulerer korleis det skjer i ekte system. Om du vel elektrofag, er moglegheitene mange og variasjonen stor. På Åsane vidaregåande ønskjer vi å førebu deg til dette og kanskje det viktigaste: gi deg ei trygg og god oppleving av fagkunnskap sammen med resten av klassen.

Vg2  Elenergi og ekom

Med Vg2 Elenergi og ekom (elektronisk kommunikasjon) kompetanse kan du velje mellom åtte ulike fagbrev - alt frå elektrikar til heismontør. Undervisninga er lagt opp som øvingar, på same måte som på Vg1, men på Vg2 monterer vi meir samansette anlegg og skaffar oss utfyllande kunnskapar om desse.

Eksamen frå Vg2 gir deg anledning til å søke læreplass i ei bedrift slik at du kan ta fagbrev. Vegen mot fagbrev etter Vg2 tar vanlegvis 2,5 år.
Du har også muligheter til å søke Vg3 Påbygging for å oppnå generell studiekompetanse. Vidare kan du studere ved høgskular og universitet.